Tokante nos

Active Chance ta duna supsidio na esnan ku ta trahando pa konstruí un mihó futuro pa hendenan na Kòrsou.

Nos ta finansiá un mihó futuro.
Nos ta komprondé ku mester traha duru i tin sakrifisio ora ta konstruí un mihó futuro i nos ta respetá e personanan ku na Kòrsou ta komprometé ku e kousa akí. Nos ke yuda ku finansiamentu di proyektonan ku ta dediká na:

  • Mehorá kalidat di bida
  • Yuda hende pa yega na nan pleno potenshal
  • Kreashon di mihó komunidatnan

Nos ta aksesibel.
Kada kuartal nos ta duna apoyo pa medio di supsidio di tamaño mikro, chikí i mediano. Den nos esmero pa hasi nos medionan di supsidio alkansabel, nos ta basa nos eksigensianan pa bini na remarke na e kantidat di sèn konsedé pa asina gruponan asina yamá grassroots òf personanan ku formalmente no por afiliá nan mes na un grupo òf organisashon, tambe por apliká.

Nos ta enfoká riba proyektonan probá pero ku no ta risibí sufisiente fondo.
Nos ta enfoká riba e hendenan i proyektonan ku ya kaba ta hasiendo un bon trabou i ta hasiendo un diferensia positivo pa nan komunidatnan, pero ku tradishonalmente no ta risibí sufisiente finansiamentu di otro fuentenan. Nos ke hasi posibel pa e personanan akí sugui hasi nan trabou.

Nos ta enkurashá finansiamentu independiente i sostenibel.
Nos ta finansiá te 50% di e kosto total di un proyekto (basá riba máksimonan espesífiko) i nos ta spera ku e risibidó logra finansiá sobrá ku otro fuente (finansiamentu propio, entrada di negoshi, otro supsidio etc.). Mienstras ku aki riba nos ta bisa ku tradishonalmente no ta risibí sufisiente finansiamentu, nos ta spera ku e bon trabou ta sigui den futuro. Esaki ta e motibu pa kiko nos ta buska proyektonan ku ta aspirá pa por tin finansiamentu duradero.

Nos ta konfia.
Nos ta konfia ku personanan ku ta solisitá supsidio serka nos ta hasi esaki di manera honesto i hustu. Tambe nos ta konfia ku e personanan ku nos ta selektá i ta risibí supsidio, ta usa e sèn pa loke a hasi e petishon p’e i hasi loke nan ta bon den dje. Nos no lo ta aktivo den maneho òf midimentu di e proyektonan. E úniko kos ku nos ta pidi ta pa esnan ku a risibí supsidio kompartí resultadonan pa medio di relato, dato, potrèt etcetera. Nos ke mira, tende i selebrá e impakto positivo ku boso proyektonan tin i kompartí ku hendenan na Kòrsou (pa medio di nos página di internèt) e bon trabou ku ta hasiendo den nos komunidat.

Nos ta siña.
Nos sa ku no tur biá nos lo tuma e desishon korekto. Nos sa ku nos lo otorgá supsidio òf finansiá proyekto ku nos no mester a aprobá. Pero nos komo fundashon ta komprometí ku nos trabou i na kabamentu di kada siklo di finansiamentu nos lo evaluá pa rekonsiderá, adaptá i mehorá nos modelo i kontinuamente mehorá pa otorgá supsidio ku sentido i di manera efektivo.

Apliká awor.